簡單。蝦仁毛茄椰菜冬蔭功醬炒韓式粉絲
我只要少少靈感，就可以嘗試將唔同國家嘅菜式風格，混合埋一起！雖然唔係似似得，你地知我有幾求其啦😅但有時候都幾好味，又簡單！又見得下人㗎！
今日同大家分享嘅，就係用我响泰國買返嚟嘅冬蔭功醬去煮韓式粉絲！冬蔭功配合海鮮及蔬菜的鮮甜，與及這粉絲吸味又不會太過軟身的特質，一定會係一道好吃的菜式！
材料：
1 韓國粉絲一包
2 泰國毛茄一包，約廿條，切掟打直一開四！
3 椰菜半個，切絲！
4 冬蔭功醬一包，超市有售！
5 急凍虎蝦仁一包，惠康價$49！溶雪後用生粉醃匀約十分鐘，然後用大水沖洗，再用適量鹽，胡椒粉，麻油醃30分鐘以上！
6 上湯，約四碗！
7 香茅一枝，切碎
8 蒜頭四至五粒，切碎
9 鮮奶或椰奶半碗
調味料：
麻油，胡椒粉，鹽各少許
煮法：
1. 爆香蒜蓉同香茅，中大火落毛茄炒至出潺，加一碗上湯炒至乾身後，再落椰菜，下點鹽及胡椒粉調味，炒至軟身及出水，剩起所有連汁備用！
2. 爆炒一會蝦仁至半熟，剩起備用！
3. 將粉絲汆水，剩起用剪刀剪幾下，方便炒匀！
4. 小火爆香冬蔭功醬，下上湯及奶推散醬料至大滾，落粉絲吸收汁液後，將所有材料回鑊，炒匀及乾身即可！
Search